昨晚，妳告訴我，妳就要和他去旅行了。
到底，妳心裡是否既高興又期待？
還是，會擔心我的感受？
不想發生的，始終都要發生…
＊ ＊ ＊
今早，妳向我訴說，他埋首於工作，冷落了妳。
作為妳最信任的人之一，我當然要聽妳傾訴，替妳分憂。
我只能說，當心中重視一個人的時候，不應該發生這種情形。
而且，妳和他只是在一起數年…
另一方面，我又感到，妳仍然很渴望他對妳好…
無可避免地，我只能夠內心在酸。
但是，我真的很想妳開心，即使能令妳開心那個人不是我。我還勸妳，趁旅行時和他說說吧…
難道，真正愛一個人真的可以這麼大方？上次車妳去買飯盒給他也是這樣。
＊ ＊ ＊
然後，晚上遇到意外…
好想得到妳的關心。不過，我卻沒法等到妳的一個電話。
或者，我也是不過如此？
今晚，心在哭。
這兩個星期真的好忙，好辛苦。
忙到連blog也停頓了。
但是，不代表我心裡沒有妳。
我想快點完成工作，然後和妳行街、拍拖。
忙碌過後，總是想對著自己想對著的人。
只是，我們時間不夠。
每次都只能夠匆匆相聚幾小時。
不能夠和妳寫意地吃過晚餐，才和妳獨處…
而昨晚，我沒察覺到，經過這段時間的辛勞，其實妳我都已經身心疲累，體力透支。
不過，對著妳，真的好開心。
多謝妳陪我。
七時十五分，關燈，關門。
一個人離開公司。
五天的繁忙工作，暫告一段落。
這個時候，最想和妳寫意地吃個晚餐，然後靜靜地獨處一下。
當然，到最後這個只是一個幻想。
不過，妳今天已經兩次哄我。
第一次，當妳發嬌嗔地說「咁我唔係成日好似你咁自由咖嘛…」的時候，我明白妳的潛台詞是「我都想陪你呀…」
第二次，當妳有點埋怨地說「你係咪下個星期去公幹呀…」的時候，我聽得出妳的意思是「你出差，我又冇得見你喇…」
好多謝妳對我好。
原先只打算放工同妳食個麵，傾一陣偈（因為妳上星期五話今日有機會再傾）。
但到差唔多放工，妳又想二人世界。
雖然今日心情麻麻（太多嘢要處理），又有啲攰，但我又點會捨得冷落妳？
每次同妳一齊，都覺得時間太短。
每次攬住妳，我都唔想走。
就算我要求多多，妳都好大方咁任我擺佈。
我成日講嘅「無拘無束」，而家對住妳真係感受到。
喺妳面前唔需要顧慮太多，亦都唔需要造作…
對住妳可以瞓，可以坐，可以攬住妳，可以錫妳，可以好近咁望住妳對眼，講內心說話…
而我最鍾意嘅就係……妳好似細路女咁坐喺我身上，攬住我。
我好喜歡咁樣對住妳。
當然，我亦希望，妳每次對住我都覺得舒舒服服，亦好享受同我一齊嘅時光。
妳問我，有冇諗過我地將來會點？
我當然有諗。
喺我腦海中，成日都幻想同妳正式喺埋一齊嗰啲畫面，一齊生活，一齊旅行……，嗰種開心同幸福。
但係，要點樣先會去到嗰一日？
我都冇絕對嘅答案。
因為，呢樣嘢係我從來未面對過嘅。
我覺得自己識得處理好多事情，但係，咁耐以嚟，我從來未試過同一個人講分手…
所以，我都唔肯定點做先最好。
但係，如果妳問我，呢一刻最想做啲乜？
咁我會好肯定咁答妳：我想隨時同妳拍拖，隨時見妳，唔受任何限制。
所以，我有想像過，如果我真係由而家開始一個人過生活，會點？
我可以煮飯比妳食，妳得閒嘅時候可以上我度坐，傾下偈，食下嘢，過下二人世界…妳可以隨時搵我，隨時約我…
記唔記得十一月嗰幾日？我同妳煲咗三個鐘電話粥，同妳去海邊，去車妳返屋企，然後喺海傍談心…
我記得妳當時仲話，如果我又ｆｒｅｅ妳又ｆｒｅｅ會點？
嗰幾日嘅自由，我真係過得好開心。
我諗，如果真係咁樣嘅話，妳會唔會更加鍾意我？更加想同我喺埋一齊？
今日，係四年先有一次嘅日子。
好想同妳做一啲特別啲嘅事。
咁樣，下次二月二十九日，我地可能仲會記得番今日做過啲乜。
我唔識製造啲咩浪漫。
今晚，亦無時間同妳做啲乜嘢。
所以只係好無聊咁上山食茶餐廳。
或者，四年後我地唔會再記得今日咁無聊。
又或者，四年後妳唔再記得有我。
但今晚，好多謝妳陪我，陪我做啲無聊嘢。
同妳一齊真係好開心。
我唔係一個大男人，因為我會煮飯，洗碗，打掃。
但係，有啲事情，我就好傳統。
例如：男人要保護女人。
我唔接受一個女仔開門比一個陌生男人。
我唔想有任何意外發生，即使機會微乎其微。
我好想保護我鍾意嘅人。
可惜，我想做，但做唔到！
有時，真的好難受。
突然的約會。
和妳吃一頓簡單的，然後到某處談心，對著我，妳是否感到舒服、開心？
我常說的自由自在地交往，就是這個意思。
＊ ＊ ＊
同一件事，未必只有一個看法。
全心全意對一個人好，為她付出。然後，到有一天停止了。
旁人就說，你是一個衰人。
為甚麼？
為甚麼以往的好不再被提及？
就算對對方好二十年，只要一天停止，就馬上變成罪人。這是愛情嗎？
愛的反面並不一定是恨。
為甚麼不可以是：因為愛，兩個人在一起。愛減弱了、消失了，可以和平地分開嗎？
在我來說，假如有一天，愛消失了，我也不會因此而當她是仇人，不會去恨她。
這個就是我。
我應承過妳，除非妳想我…我先會。我唔會再亂嚟。而且我一定會問准妳先。
好多謝妳咁信我，比多次機會我去證明自己做得到。
我想妳明白，喺咁嘅環境，二人世界，對住自己鍾意嘅人，妳喺我心目中又咁完美，要忍得到唔係咁容易。就算本來唔想，都會變咗想…
但係，最終我忍得住，得一個原因。
就係，我真係鍾意妳。唔會為咗呢樣嘢而冇咗妳。
好似上次咁講，妳比我揀，我一定揀妳繼續喺我身邊，而唔會揀得到妳。
其實，就算同妳咁樣纏綿，已經好舒服好溫馨。
而且，我知道其實妳唔係唔願意比我，只係想保留一點點女性嘅矜持。
我知對女仔嚟講，呢樣嘢只係會發生喺自己真係好鍾意嘅人身上。
多謝妳咁愛我。
有冇諗過，我地去到咁親密嘅程度之後，仍然係如常咁交往，我地之間嘅感情有幾深？
我地同一對熱戀嘅情侶，又有咩分別？
分別只係，我地需要一齊去傾點樣解決問題。
當我地落到街，我想拖妳手的時候，妳話：「點解你咩都唔怕？」
我唔怕，係因為我知我自己個心喺邊個度，我知道我想往後幾十年同邊個一齊先至無憾。
假如有一日被人見到，我都唔會否認，我已經深深愛上咗妳。
妳識我唔耐，但妳應該知道，我唔係做事衝動嘅人。而我一心一意向妳，想同妳一齊，係因為我清楚知道，可以同妳一齊係我生命中最幸福嘅事。
如何知道自己愛著一個人？
有時，真的好簡單。
只是五秒。
妳竟然讓我在那個熟悉的地區，拖著妳的手五秒。
當我捉緊妳柔軟滑溜的雙手，輕輕碰一碰妳鼻尖。
我就知道，我愛著妳。
因為，那一刻的感覺很甜蜜。
真的很渴望有一天是這樣自由地和妳戀愛，而不需收藏起來。
