妳說,好想煮飯比我食,不過只限一星期一次…
我說,好想帶妳去旅行,由我安排好一齊,不用妳煩憂。(當然,錢也是我出^_^)
這是我們在某一天向對方說出的「愛的宣言」。
和妳一起,好有「被愛」的感覺。
我們的感情也愈來愈穩定。
所以,雖然今次要分開十天,我也不再害怕,回來妳會不記得我。
「傻妹,我會好掛住妳!唔准同第二個男仔去街呀。」
好好等我回來,比我好近好近,像上一次一樣,舒服地對著妳…
然後和妳分享經歷,好嗎?
妳說,好想煮飯比我食,不過只限一星期一次…
我說,好想帶妳去旅行,由我安排好一齊,不用妳煩憂。(當然,錢也是我出^_^)
這是我們在某一天向對方說出的「愛的宣言」。
和妳一起,好有「被愛」的感覺。
我們的感情也愈來愈穩定。
所以,雖然今次要分開十天,我也不再害怕,回來妳會不記得我。
「傻妹,我會好掛住妳!唔准同第二個男仔去街呀。」
好好等我回來,比我好近好近,像上一次一樣,舒服地對著妳…
然後和妳分享經歷,好嗎?
星期二,又再次「早機去,晚機返」。
又係成日見唔到妳,搵唔到妳。
只能夠靠「想像」去同妳相見。
於是,喺飛機度,合埋眼,我又諗返起以往咁多次同妳纏綿嘅畫面。
除咗妳美好嘅身段,性感嘅衣著,仲有好多妳對我好,氹我嘅說話同動靜,全部都喺我腦入面重播。
最後,我發覺,喺一個只得我倆嘅環境,我先見到妳對我「最真」嘅一面。
好似上星期三咁,妳一見到我就攬住我話「尋日好想搵你好掛住你呀」。
喺一個只有我倆嘅地方,妳唔需要再理會任何人,妳可以同我說悄悄話,妳可以對我任性嬌嗲,妳又可以用溫柔的方式對我,令我完全被迷倒。
妳會毫無保留咁令我知道,妳真係鍾意我,鍾意對住我,對我絕對信任。
所以,我想妳明白,點解我會成日都想咁樣對住妳。
嗰日我忍唔住打電話比妳,係想同妳講「我好掛住妳,好想要妳」…
傻妹,對唔住,又嚇親妳。
妳知嗎,每當我月頭晚晚捱夜,我就好渴望快啲做晒,然後可以約妳食飯,或者同妳喺冇人搔擾我地嘅房間,零距離咁攬實妳,望住妳。
妳可能又會鬧我,成日諗住同妳單獨相處…
又或者,妳又會話,變成習慣。
但係,我覺得,一個月先咁樣無拘無束對住妳一次,又點會嫌多?又點會唔想?
* * *
今晚,我知妳加班陪我…
我亦想同妳放工後一齊食嘢。
不過,後來聽到妳要返去,佢買嘢比妳食…
其實,我唔係要妳成日陪我,我亦明白妳唔係成日都可以陪我。
但係,咁又有咩關係呢?
我鍾意妳,唔係因為妳可以陪我。
鍾意妳係想令妳開心,感到幸福,知道世界上有一個人緊張妳,重視妳。
只要一日我仲鍾意妳,我就想做到呢幾樣嘢。
同妳可唔可以陪我,可唔可以同我一齊,根本就冇關係。
明唔明?
2012年的最後一天。
一年,又這樣過去了。
和妳在一起,已經有一年五個月這麼久。
除了有時會因為我們面對著的問題,而有些不開心之外,和妳的相處一直都很甜蜜很愉快。
感情也在慢慢累積。
和妳吃過無數次的晚飯,也有駕著車和妳去遠一些的地方談心…
和妳說過幾千分鐘的電話,和妳拖著手,逛街買衫…
也和妳過了好多次只屬於我倆的二人世界…
在妳生病時跑來看妳,陪妳看醫生;也因為擔心妳的安全而在妳家附近守候一整天…
有煮湯妳喝,也常常買小禮物哄妳。
每一個片段,都是非常甜蜜。
當然,我知道真正和妳相處的時間仍然有限,我也有好多做得不夠好的地方,和沒有能力做到的事情…
不過,和妳相處的這段時間,我希望妳能夠感受到我對妳的真…
也希望妳能感到我對妳的愛。
或者,將來仍然不明朗,但我希望,無論將來如何,我都可以繼續給妳快樂。
已有一段時間沒有寫BLOG。
因為,自從那晚我們的約會因妳生病而取消之後,我們都沒有太多相聚的機會。
妳剛病好,還在休養身體…
而且又到了月初,工作又開始繁忙…
看來,要再等一些時候,才會有下一次和妳的約會,才可以跟妳靜靜地單獨相處了。
幸好,這段日子,還是有些甜蜜的片段…
當妳在醫院過夜的時候,我跑落街和妳通電話,在妳入睡前陪妳傾談…
妳當時說,如果不掛念我就不會為我的生日飯而安排…
那天和妳在CAFE,妳說妳的電話其實沒有甚麼用途,我說只是用來和我短訊談情,妳笑著說:「係喇…」
星期三,和妳到日本餐廳吃飯。
那一晚,妳的心情不錯。
和妳研究怎樣轉移通訊錄,又談談其他事情…
可以在妳耳邊輕聲說話…
這樣子和妳一起,感覺好舒服…
但是,我說要這樣子和妳拍拖,也要好多條件都符合才能做到…
要妳有空的時候,我又有空,要妳有心情,沒有身體不適,要大家不用加班,要大家不疲倦,有精神…
就好像星期五,可以跑來見妳也不一定可以拍拖。
我說這些,不是抱怨…
而是,覺得可以拍拖的時候,要好好珍惜在一起的時光。
當可以這樣子一起的時候,應該開開心心…
畢竟,到底怎樣才會在世界上遇上一個人,可以在依靠時感到舒服和開心…
或者妳不會相信,我每天都見到妳,但是,我仍然會思念著妳。
這幾天晚上,我都收不到妳的訊息,妳知道我拿起電話多少次嗎?
日間,工作忙的時候,妳知道我有多想快點完成工作…
然後和妳去吃頓晚飯,又或者到海邊拍拖,擁著妳談心…
有時,好想好想靜靜地對著妳…
忘卻工作,忘卻令人煩厭的事…
眼前只有妳。
因為,每次單獨對著妳,都很愉快。
妳…也想對著我嗎?
自從三個星期前同妳纏綿之後,一直都冇乜機會再同妳拍拖。
係,當中我地有食過兩次飯,車過妳兩次,周末過嚟同妳食早餐…
但見面嘅時間都係好短…
甚至可以話係匆匆忙忙。
而上次妳話,我成日都係掛住嗰樣嘢,妳嬲咗我,對我失望…又講「鍾意?定係蠢?」之後…
坦白講我已經再冇信心。
我心中係有唔明白, 因為明明最近幾次妳都好投入同主動對我好…
我覺得妳應該係開心嘅,但原來…妳唔係咁鍾意咁樣同我二人世界。
其實, 喺我心目中,只係覺得我地係一對熱戀中的情侶,所以先會有咁親暱行為。我真係冇諗過其他原因…
而且,我覺得自從同妳…我地係比以前親近咗好多咖…
妳最近又講啲奇怪嘅說話,好似前排講「擔心我?我諗你冇」,今晚又突然話「太信你,係一件好事?」…
我開始唔係好知妳諗緊乜…
妳會留意到,每次我對住妳,我都係好開心。
但係,妳最近就好似變返我地初初開始嗰時咁,有啲捉摸不定…
有時,妳會令到我好開心。例如,妳用舌尖錫我,買嘢比我搽,叫我陪妳食早餐…
但有時,妳又好似覺得我好煩…
原本,以為同妳一齊搭車,同妳食飯,同妳去海邊,同妳去CAFE,同妳去二人世界,攬住妳,錫妳,同妳傾偈…每一樣都係同妳增進感情…大家甜甜蜜蜜咁過…
或者,只係我一個覺得咁樣就開心?
其實,我真係好鍾意見到妳挨喺我膊頭,對住我甜絲絲咁笑個樣咖…
昨晚,我堅持送妳回家,卻惹來妳的不滿。
記憶中從來沒有一次,在的士車廂裡,妳是那麼冷漠。
過往,總是嫌車程太短。雖然不能在車廂中吻妳,但有時吻妳的手,也無比溫馨。
* * *
然後,今晚又因為我提出那件事情,而令妳失望。
假如,我和妳去某間餐廳,卻有不愉快的經驗。我不會再帶妳去。
相反,如果曾經到過某間餐廳,氣氛情調食物都好,大家都感到愜意的話,我一定會提議再去。
或者,那件事不能夠與上餐廳相提並論。
但道理卻是一樣:因為,我真的覺得過往幾次我們都有著愉快的經歷,我才會…
而且,我可以約妳去看戲,拖著手逛街,郊遊…嗎?
* * *
多年前我已寫過,為甚麼香港的夏天那麼熱,人們仍然堅持穿著西裝?
因為那是一個社會認同的標準。
然而,那卻是完全違反一個人的感覺的事。
違反個人的感覺而跟隨社會上的制度或標準而行事,又豈止夏天穿西裝一事?
例如:妳我相愛(感覺)卻不能在一起(制度)。
不過,感覺也是一種虛無飄渺的東西。來無影,去無蹤…
當我接二連三地惹妳不滿…
當一些之前令妳開心的事(送妳回家/和妳纏綿)現在卻令妳反感…
或者,妳對我的感覺已經不再一樣…
又或者,我根本沒有能力令妳繼續喜歡我…
和妳一起之後,我做了許多以前不會做的事,例如尷尬地買化妝品…不過,妳卻可能覺得我是為了某目的而做…
上星期和妳短暫相聚的溫馨感覺,也突然只像一場夢…
今晚本來打算開夜,不過現在我已沒有那個心情。
今個星期同妳拍過幾次拖,雖然時間好短,但都好開心。
星期三接妳放工,喺車廂中,我合上眼比妳錫。
被妳濕潤的舌尖輕輕觸摸…原來真係好舒服同陶醉咖。
星期四同妳同妹食咗一頓晚飯就送妳返去。
到星期六,我地又再次喺車入面度過二人世界。
車外面落住大雨,車入面就播住柔和嘅音樂,喺咁浪漫寧靜嘅環境下,我又再感受一次比妳錫嗰種舒服…
妳仲瞓喺我大脾,比我輕輕撫摸妳嘅頭髮同面頰…
真係好想同妳咁樣靜靜地過一晚(當然,妳應該好快就會瞓著咗,然後我大脾到第二日就會斷咗)
其實,早一晚我地先過得咁溫馨,妳點解要亂咁諗我冇掛住妳呢?
我再講多次,我真係好想對住妳!我亦知妳想對住我。
如果冇任何限制,我諗妳同我都好想兩個人過一日。
有時諗,表面上我地都冇(未)做到決定,但其實心入面已經知道自己呢一刻鍾意邊個…
假如,而家我可以自由嘅話,我願意對住妳嗎?我會毫不猶疑。
假如,而家妳可以自由嘅話,妳…想對住我…嗎?
昨晚,我又夢見妳。
妳親吻我的唇及頸…夢中,妳是完全屬於我的。
所以,今天一個人靜下來,躺在床上,又再想起我們交往的一切。
無論想多少次,我都仍然會帶點不敢相信…
不相信這麼好的一個女孩子,竟然會喜歡我。
竟然成為了我的親密女朋友。
由最初對我的冷漠及戰戰兢兢…
到現在,妳卻甚麼都告訴我,開心的,不開心的…甚至,連生理周期也告訴我。
妳也不怕我生氣,時常說些戲弄我的說話…
妳又比以前多了說「掛住我」及送「吻你」給我。
再加上,和妳纏綿時妳對我展示的温柔…
雖然妳始終未直接對我說一聲「我愛你」,我也可以肯定妳是真的喜歡我的。
我們也多了默契,時常明白對方的心意…
到了現在,看到我們拍拖的人(例如:那個咖啡店的老闆),敢說我們不是甜蜜的戀人嗎?
有時,真的好想周遭的人對我們說,「你地好襯呀」
MMM及WWW的名字,寫在一起的話,會怎樣呢?
上星期,妳突然提到,妳在旅行時也有買杯麵回酒店宵夜的習慣。
那一刻,好有衝動抱著妳,告訴妳我也是一樣!
然後,心入面又燃起那個欲望…
想和妳一起去旅行的欲望。
和妳在東京街頭,手拖手在漫步…
和妳一起挑選好看的衣服,由妳試給我看…
和妳到處找尋美食,看妳吃到美食時的滿足樣子…
和妳看著櫻花飛舞,替妳拍一些美麗的照片…
讓我駕車帶妳到北海道的草原上欣賞花海與美景…
晚上,又可以和妳在酒店過一些浪漫纏綿的時刻…
想像中,一切情景都是那麼甜蜜,那麼令人嚮往!
但同時,這些幻想,卻令我有點心酸。
到底,何時才會實現?
難道,真的要等我們老去才能實現?
每當想到我並沒有這個和妳去旅行的權利,我就會很沮喪。
還有一天,旅程就完結了。
是否有點意猶未盡呢?
通常,旅行臨結束前,都會有點不想完結的心情(放假的時間總是過得特別快!)。
不過,在我來說,卻有點終於捱完了的感覺。
由上星期三開始…
如果不是早起一小時,陪妳上班,可能我的心情會更差。
這麼多天,沒有一天不想起妳…
妳說得對,如果不是短暫分開,又怎知道自己有「幾掛住」。
明天,還有明天…
妳要加油啊!要滿載而歸!
「聽晚見…」
星期五,工作依然繁重。
很少時間上線。
但是,每次上線,都會看看,妳有出現過嗎?妳有發訊息給我嗎?
原來,不能隨時隨地找到妳,是這樣失落。
我終於明白,原來當我出差或者去旅行時,妳在這裡等我的滋味是怎樣的。
妳知嗎,我已經三天以上沒有聽過妳的聲音了…
幸好,每晚和妳的通訊,妳都對我好好,時常哄我。
至少,我知道妳人在遠方,心仍是有我。
對嗎?
「快啲返嚟,我要妳錫我,對我好,乜都聽晒我話!」
I miss you.
終於,輪到妳放長假。
今日返工,見唔到妳,感覺好失落。
好掛住妳,好想聽到妳的笑聲。
而妳一走,又發生了很多事情,成日都喺度打仗,好攰。
加上唔舒服,冇精神…
咁多事情,都唔可以同妳傾訴…
講真,今日,過得好辛苦。
之前,我同妳講,有時啲嘢,可以好複雜,亦都可以好簡單。
「愛」呢樣嘢,原本只係一種直接嘅感情。
只係得「愛」同「唔愛」。
愛對方,就自然會想對對方好,氹對方開心,關心對方,亦會自己喺度偷笑…
前日套韓劇都有咁嘅一幕:個男仔望住個女仔,無端端笑,個女仔問「仲咩喺度笑?」,男仔答「唔知呀,見到妳我就想笑」。
睇到呢度,就諗起自己都係咁。
我諗,所有戀愛中嘅男女都係一樣吧。
不過,人類社會建立咗某啲制度。
「愛」,變成「可以愛」「應該愛」「不可以愛」「不應該愛」。
「相愛,但唔應該喺埋一齊」「唔想愛,但唔應該分開」…
事情,亦都變複雜了…
當妳對住我,覺得舒服,開心嘅時候,妳當我係邊個?
其實,都唔緊要。只要我係妳愛嘅人,妳又鍾意對住我,妳對住我開心就得。
呢個,就係原本最直接嘅感情。
妳諗下,呢咁多個月,我地係迫自己,勉強自己去對住對方?定主動、渴望見到對方,聽到對方聲音,同淨係想對住對方兩個人無人騷擾?
妳話,如果當初妳拒絕我,就唔會有咁多問題。
但係咪真係咁呢?
我記得之前妳話,就算我早一年識妳,可能到上年我地都一樣會鍾意咗對方…
緣份嘅嘢真係冇得解釋咖。
有時諗,可以話妳嘅出現令我變心…
但亦可以話,妳只係一個觸發點…
或者,有冇妳嘅出現,我有一日都會突然唔想再對佢好,唔想淨係我單方面輸出…
同樣,妳有冇諗過,如果妳冇遇上我,佢又會唔會識得對妳好啲?
咁當然,如果我地冇相識過,冇比較之下,我地可能會繼續安於現狀。
但現狀係咪就冇問題呢?
* * *
總之,好似我講,其實已經冇「如果」了。
因為,我已經鍾意咗妳。
未識妳之前,我從來唔知有一個女仔好似妳咁靚,咁溫柔,咁賢淑,咁細心,咁為人著想……但又鍾意我,錫我!
我諗,呢樣就係兩個人相戀最開心嘅地方。
* * *
講返轉頭,我想知,咁點解妳唔拒絕我嘅?
其實…我向妳表白嗰時,妳係咪已經有少少鍾意咗我咖喇?^_^
自從5號與妳過了一個舒服纏綿的晚上,近幾星期都沒有機會同妳拍拖。
前個星期,連續四天的加班。
幸好那個星期六可以見到妳,不過那天妳心情不佳,也沒有興趣和我談心。
結果我只好在地鐵站放下妳…
上星期,妳約了我妹,又去做美容,然後我又依樣加班…
本來打算約妳星期日出來,但妳不舒服,未能答應。
結果,星期天風和日麗,如果可以和妳兜風有多好?
雖然我們每天都會見到大家,雖然我們下班後有吃過一兩次飯…
真真正正和妳相處的時間卻不多。
而且,妳也知道,在街上,我只能扮演普通朋友/同事的角色。
可能妳會覺得我貪心,或者覺得我要求多多…
但妳可明白我渴望見妳,渴望和妳獨處的心情?
妳話,冇人鍾意另一半讚第二個。
雖然妳係話緊我,但我反而被「另一半」呢個詞吸引咗。
唔知點解,我覺得好窩心。
不過,諗返我地之間嘅相處,其實早已同「另一半」冇咩分別。
妳成日問我件衫好唔好睇,又或者著咩返工好…
甚至,問新買嘅內衣好唔好睇…
妳又會煲湯我飲…
我會買嘢比妳用,比妳食,比妳扮靚靚…
妳病我會陪妳睇醫生…
離港嘅時候我會打長途比妳…
我地又可以好親密咁傾偈…
妳攰我會幫妳按摩…
又會過二人世界…
所有所有,其實不知不覺間,我地已經將對方當咗另一半…
相遇一年,今晚嘅約會,我覺得好温馨。
同妳第一次真真正正咁結合。我感覺到妳好舒服。好鍾意妳完全相信我,完全交托比我。
我可以幫妳按摩,鬆弛神經。妳似乎滿意我嘅手勢。(⊙o⊙?)
同妳好親近咁樣傾偈,傾咗好耐,而且,毫無保留咁將內心所想講晒出嚟。
仲有,妳問我新買嘅上衣好唔好睇嘅時候,我覺得真係好親密。
而妳著住背心攬住我,但又叫我出去買嘢食,我講笑話「衰妹,係咪玩嘢呀」。好攪笑。
* * *
其實,如果我地真係咁樣過一晚,我相信會好温馨好難忘。
所以我話,十一月嗰時妳問,如果妳又free我又free會點?我諗,呢個就係答案。
多謝妳咁愛我。